達達生日快樂~!
今日4月29日係達達生日啦.....第一年同佢過生日, 好開心!!! 雖然尋日先o係醫院出返黎, 身體仲係有少少唔舒服, 但係男朋友生日喎....點都要同佢出去慶祝下啦 ^_^ 佢今日朝早六點鐘起身去接舅父返工, 而我就繼續冇返工, 請病假休息....夜晚等達達放工佢就黎屋企接我, 我地去 Star City 裡面一間叫 Pyrmont o既意大利餐廳食野.....我地叫左兩個餐, 同埋有酒....我叫左個羊扒, 不過就好似太熟, 佢叫果個牛扒同蝦就o既好味.....食完之後, 佢又話要賭兩手喎....放左 $10 落去玩 rapid roulette, 第一盤就贏左四十蚊, 但係再玩多幾盤, 十蚊全部冇哂...!!! 哈哈哈哈....叫左佢唔好咁貪玩架嘛....是但啦, just for fun~ 跟住我地去接舅父放工, 因為佢要開會開到好夜.....仲有另一個同事都一齊....我地四個人去 Burwood 食甜品 (舅父同個同事就食晚飯)。之後我地個個都好累啦, 要返屋企休息~ 今晚達達收到我織俾佢o既頸巾, 唔知佢鍾唔鍾意呢? 我就覺得隻色好襯佢, 好 fashion 架....haha....遲o的天氣凍我要佢帶出街架.....嘻~~~
tat
入院
今日成日係醫院渡過.....打針, 吊鹽水, test.....聽日達達生日, 今晚早d訓。係呢度我要多謝幾個人。 首先我要多謝我o既 flatmate Ceci, 因為佢知道我病之後好擔心我, 去醫院探我, 仲帶埋一壺糖水俾我飲。之後要多謝 Simpson, 因為佢車Ceci一齊去醫院探我, 仲同我講笑....多謝 Ceci 男友阿 jon, 因為佢有打電話問候我.....多謝 Florence, 佢打過幾次電話黎問候我....多謝我老細 Marc, 因為我幾日冇返工係佢幫我做我o的野, 辛苦佢...多謝拍直, 佢有打電話問候我, 仲想過黎探我, 不過係我叫佢唔好黎, 因為遠....多謝達達舅父, 因為佢都好擔心我, 有黎探我, 仲"借"左達達俾我用一晚.....最後, 當然要多謝男朋友達達啦, 佢為左要接我出院, 同舅父食完飯後先車舅父返屋企 (西面30km遠的家), 然後再開 30km 車返東區o既威爾斯親王醫院 (我屋企就o係醫院附近)。第二朝六點佢要起身, 開車返自己屋企接舅父一齊去北區 Chatswood 返工.....由我屋企去佢屋企就好似由尖沙咀去上水咁遠, 佢仲要來回咁多次, 真係好辛苦佢.......聽日仲係佢生日, 係度要預祝佢生日快樂, 同埋呢, 我要講一句: i love u 達達貓 :)
胃抽筋呀....又請病假 :(
今日朝早7點鐘起身個胃抽筋抽得好厲害, 我自己知道發生緊咩事, 所以我無俾機會佢惡化, 跟住拎起個電話第一時間打俾波士請病假...跟住再打電話俾達達....本來我諗住入急症室, 因為我兩年前都試過, 入急症室醫生同我打麻啡同吊鹽水....不過果陣時我唔係o係屋企, 係街外, 所以一痛就痛到要生要死, 搵唔到地方休息.....今次唔同, 病發時o係自己屋企, 所以我可以控制.....我立即跳上床彎起個身令自己冇咁痛....果然, o係屋企點都好o的.....達達後來又打電話黎, 話佢黎睇我, 佢請左兩個鐘假黎探我呀, 仲買左一個菠蘿包同一個腸仔包俾我....雖然我冇哂胃口食野, 但個肚點都要有少少野落口嘛.....佢對我真係好呀....嗚~~ 其實真係好痛架....後來佢話唔准我自己焗o係屋企入面, 所以佢帶左我去 Maroubra Beach (即係屋企條街一直行過去o既海灘) 吹下海風, 吸下新鮮空氣.....後來達達要返工, 佢就車我返屋企, 我成日o係屋企乜都冇做過, 成日就彎o係張床上面, 彈動不得....最多都係上下網....不過上上下又要訓番落床.....夜晚佢同舅父黎搵我食飯, 我雖然仲痛但係都可以勉強行到....食完飯就返屋企再休息, 而家好左好多啦.....希望聽日會好返啦~
死直的一日
今日返工遇到前所未有咁忙....手頭o既工作分三日都做唔完, 公司業務擴展得咁快, 係時候要請多兩個人啦....其實今日仲係好唔舒服, 呢度痛, 果度痛....仲要俾咁多野我做 >.<
今晚我又煲左湯, 係花旗心雞湯, 因為身子弱嘛, 要飲下雞湯保番下.....
4月26號對我同達達黎講, 又係一個特別o既日子....仲有三日達達就生日lu....唔知佢想點樣慶祝呢?
Anzac Day
尋日係星期日, 中午同達達幾個同事去飲茶, 之後去左染髮...舅父就當然去賭馬仔啦....夜晚我地三個人去左食意大利菜, 好好味....返到屋企之後, 我地叫左拍直帶埋佢部 PS2 黎打機, 因為達達有 projector 所以可以o係個廳玩超大影幕嘛....簡直好似o係戲院打機咁....而GT4 o既 graphic 做得又靚...得閒我地再叫拍直帶部 PS2 上來玩下先 \(^0^)/
今日係澳洲o既 Anzac Day, 即係軍人節, 對於我黎講只係一日普通既public holiday, 我同達達今日去左探 Kidy, 因為佢搬左新屋, o係 Ryde, 由達達屋企開車去都只不過係十分鐘....我地都替 Kidy 開心, 因為間新屋好好, 雖然係細過似前間 townhouse, 但係對於佢一個人住來講, 真係綽綽有餘啦....個間格都實用過以前間屋, 最緊要加菲b都住得開心嘛.....我地o係 Kidy 屋企唱 k, 因為佢都有學友活出生命 DVD, 仲有好多碟, 我地打算以後都去佢屋企唱k算囉....哈哈......
後來我地去遊車河, 去左 Hornsby 睇新樓, 好正呀, 我地今年年尾會打算買樓, Hornsby 係其中會考慮o既一區.....兩房一廳連套房全新樓, 價錢都係大約四十萬左右 (咁當然仲有 Strata fees 同其他雜費加埋一個月三個人供千幾蚊到啦...), 遠就係遠o的, 但係有車又有乜所謂.....? 最緊要住得舒服....
今晚我地去左睇婆婆, 因為佢香港返來三日都未搵過佢, 睇佢精神好好.....
唉...聽日開始又要返工啦....又有排忙啦....今晚要早o的訓 !!!
>.<
好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲好嬲!!!!!!
殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人殺人!!!!
我要講o既就係咁多, 大家早o的訓, 早抖!!!! bye bye
補血安神牛腱湯
今日, 我冇返工, 好難得有一日自己要求o既假期....呢一排唔舒服, 好想飲老火湯, 所以今日忍唔住去左買煲湯材料....由於都係個懶字行頭 (但又想飲湯), 所以我就煲左"牛根淮山杞子湯"....嘻.....
好好飲, 又保血....又有益.....飲完自己煲o既湯之後, 真係身心舒暢呀....唔係因為淡湯真係咁有效, 可能真係心理作用啦....無媽媽o係身邊煲湯俾我飲, 對湯真係有一種饑渴呀.....嘩.....一飲淡湯就真係o係心裡面笑左出黎 ^0^ 好甜呀~~~
其實真係唔明自己, 煲湯咁容易, 點解要成日餓自己呢? 唔得, 我以後要煲多o的湯先 ^^
好累, 係時候去了....
今日仲係好唔舒服, 帶住疲累0既身驅返到公司又開始做做做.....到食飯啦, 本來應該好肚餓, 但係一食野入口就食唔落肚....好辛苦....頭先行落街, 心諗, 如果一架巴士駛過來了結左我0既生命會點? 身體好唔舒服, 好唔想返工, 又要挨....如果唔係為左屋企兩隻化骨龍, 我真係可能死左佢算啦....唔得, 為左路飛蜜柑, 我點可以死? 我真係好鍚佢地, 心肝寶貝嘛....開講尋晚, 我放左工之後達達黎車我, 因為unlce仲開緊會, 所以我地惟有等佢, 點知一等, 等左個幾鐘, 仲未開完會, 咁終於忍唔住打個電話俾佢啦, 哈~ 佢叫我地唔好等, 自己去食野先喎....果陣時已經係八點啦....end up, 我同達達挨住肚餓返去Kingsford食....Uncle真係得意....卓頌恩媽咪玉靈姨黎左澳洲探佢個仔, 因為卓頌恩佢0既思鄉病真係好重, 成日哭....唉, 搞到大家都唔知點咁....希望佢快0的冇事啦....我見過咁多留學生, 思鄉病得咁厲害我都係第一次見....咁呀, 我初初去到瑞士, 美國果陣時仲慘啦, 身邊真係一個人都唔識, 我果陣時仲細個啦....而家澳洲有咁多aunty, uncle 睇住佢, 二十三歲, 男仔黎架嘛, 真係唔化.....hey!! >.<
契家姐的信....
如果非常認識我o既人, 大概都會知道我媽咪有一個契女, 係一位o係香港非常有名氣o既女獸醫, 有好多明星, 名人, 有錢人都會不惜一切搵我契家姐睇病, 因為佢唔單止係全港惟一兩個神經專科之一o既其中一個, 仲係香港第一個用動物磁力共震o既獸醫, 而且佢做手術o既手勢非常細心, 功夫又好, o係呢一行裡面, 一傳十, 十傳八, 不過我唔多同人講我有個咁把炮o既契家姐, 費事啦....顯得我好無用....
今朝收到契家姐 email (佢個衰婆, 成日都話忙唔得閒回我email =.=, 打電話又話忙), 佢話路飛咁肥真係要同佢做多o的運動....我夠知啦, 點同佢做運動呀? 佢跑兩步都扒o左o係地下度啦, 搵野俾佢追都唔願追.....咁佢叫我試下用貓跑步器 (kitty treadmill), 邊度搵到呀? 我上網 search 過, 有幅圖, 教你點樣自己造....唉, 我又唔係木匠, 點識做呀? 真係煩惱....
病假
今日一早起身唔舒服, 返到公司仲唔舒服, 成個病貓樣, 所以返到 2點幾我就因病早走返屋企休息...五點幾達達放工同舅父一齊黎探我, 同我出去食飯, 唔知點解之前訓醒覺就好想食粟米班塊飯, 所以就去左食粟米班塊飯囉....^^本來今日好死架, 但係達達來探我就精神哂啦....希望聽日唔再咁病啦, 真係好辛苦.....
羅宋湯
今朝訓覺訓到六七點幾, 我俾出面廚房櫃門o既呯澎聲嘈醒.....o的聲音不斷"呯澎...呯澎..." 咁樣, 持續好耐, 我起初因為太累, 認為一定係小朋友 (蜜柑) 又係度撞門啦....但係聽落聽落, 覺得有o的唔對路, 於是爬起床出去睇下啦....我見到超級頑童蜜柑好乖咁坐o係廳中間, o下? 乜話? 咁即係話, o的聲係乖仔路飛整架啦? 但係, 路飛去左邊呢? 唔見佢喎.....直覺話俾我聽, 我要打開個廚櫃....真係, 路飛原來呢埋左入去 一_一".....
路飛佢唔係咁叻識得打開櫃門, 只係巧合挑開個櫃門順便"鼠"左入去, 點知度櫃門又重, 佢無力打開出去, 所以係咁撞門....唉....個傻仔.....如果焗死o係入面點算? 所以我打左佢大脾仔一下, 以示警介。
今日係星期日, 本來諗住同達達搵o的野做下, 去下街咁, 但因為太累, 所以都冇去到邊....我地中午之後就去左 Parramatta 食下午茶, 跟住買左少少野整羅宋湯, 同買左幾條法國麵包。嘻....我整o既羅宋湯都好味架, 不過如果落多o的茄膏就仲好味....同埋差左o的 Tabasco 囉....hahaha....我地今晚同偉偉同舅父一齊飲湯食麵包....好開心....
義工......
今日去左南區o既澳華公會參加青年義工訓練, 因為係達達搞o既 project, 所以一定要去 一_一"
一早起身同埋舅父去唐人街食個早餐就同達達去左買少少野 for 個 training。個 training 一點鐘開始, Jano 同拍直都有來囉, Jano 仲帶左佢一個朋友來....
四點幾完左之後, 我同達達同拍直去左食晚飯, 之後我地去左 Viva 唱k, 好開心, 因為出左張學友活出生命 karaoke, 講錯, 唔係我開心, 係達達開心....嘻.....
好累啦, 要訓....
蜜柑不要哭
不得了, 蜜柑喊啦.....
我頭先一返到屋企入門口, 見到蜜柑坐左o係貓樹度, 再望真o的, 佢右眼o係度滲眼淚呀....我用手幫佢抹 (當然抹返落去佢個身度 一_一"), 跟住o的眼淚水又再"標", 不繼慢慢流眼淚....蜜柑, 你做乜啦? 唔好喊啦.....係唔係有 dirty 走入去? 不過蜜柑仲係好唔乖, 我睇佢隻眼時候佢有咬我啦....(當然係同我玩果種咬啦)
今日心情好返好多, 因為夠訓嘛, 之前路飛成晚喵住哂, 失眠, 搞到日頭返工都冇精神, 好慘架....加上, 有達達陪我嘛...當然開心o番哂啦....今晚我地仲一齊去食飯.....hehe.....星期六又可以見到佢啦....好開心 !!
我都要買樓?
呢兩日心情好差, 唔好問咁多, 總之就係好差啦....蜜柑又唔乖, 我見到佢都想哭....路飛尋晚由三點鐘開始就O係我睡房門口狂叫媽咪媽咪, 叫到五點幾先收聲....
不過尋晚11點達達就O黎搵我, 雖然只係坐左10分鐘, 但係都好好啦....佢又同我講起買樓O既野, 因為佢尋日同做銀行既阿JANE, TOMMY 食飯講開Home loan 既野....舅父都會支持我地買樓, 所以會係三個人既事....至於買邊區, 暫時未定....睇下樓先囉, 呢D野, 唔可以心急....至少應該唔會係今年之內O既事掛? 唔知呢....
搬去西貢?
今日o係公司又同媽咪傾 long distance, 一傾就傾左 45 分鐘, 都係講無聊野啦....唔好以為我返工唔做野, 其實一邊夾住個電話一邊做野, 都幾辛苦架....阿媽就日日打電話黎我公司, 一日打幾次, 都咪話唔煩....鬼叫佢係我媽咪咩.....
今日我地o既話題係, 申請佢同爸爸過黎澳洲住, 咁就可以成日見到個女啦....咁講講下, 又講到賣樓, 搬屋....媽咪今次又幾認真咁話, 我地打算遲o的等樓價再升高o的就賣左錦繡花園層樓, 跟住就按照爸爸o既夢想, 搬去西貢租一層細單位, 因為爸爸話佢想移民之前, o係有生之年可以一嘗住西貢之味....住一年又好, 幾個月都好嘛.....
咁我就當然唔知佢地兩個搞乜鬼啦, 由得佢地囉, 老人家, 天馬行空, 天方夜譚....唉.....
路飛蜜柑路飛蜜柑.....
蜜柑和匙羹
路飛, 係媽媽唔好, 搞到你咁肥, 傻仔, 你舔唔到 pat pat 呀? 點算呀? 真係見到都心痛囉.....路飛乖, 媽媽鍚哂路飛飛, 因為路飛飛好乖, 又鍚媽媽, 鍚爸爸, 鍚細老, 媽媽鍚哂你....
蜜柑, 媽咪成日同你講, 你o係石頭爆出黎, o係街拾你返黎, 生舊叉燒好過生你....邊個叫你咁唔聽話!!! 成日通屋跑, 跳上跳落, 又咬爛o的野, 打家姐, 抓媽媽, 咬哥哥.....你唔好以為你個樣生得比哥哥可愛一o的, 又多人鍚你多o的就作反呀!!! 哼, 真係生舊叉燒好過生你。不過蜜柑, 其實媽咪都好鍚你架, 不過係用另一種方法鍚....
唉....今日媽咪心情好差, 所以o係日記寫埋o的咁o既野....講下咋...唔洗咁認真掛?
Palm Beach....
今日天氣好好, 所以一早起身同達達去旅行。目的地係開車北上個多小時o既 Palm Beach, 果度風景好靚架, 有好多好靚o既海岸線同沙灘....有望到太平洋o既風景, 亦都有寧靜內海o既景色....
天氣雖然係有少少熱, 但係o的海風都好舒服囉....我地見到有好多人滑浪同游水, 一家大細 family day, 仲有o的人帶埋狗狗出黎, 真係睇見到好開心.....而我最開心當然係有一隻大貓貓o係我身邊啦....真係辛苦佢開左成日車...不過都係值得o既....嘻 ^+++^
嗯, 今日真係好鬼開心 \(^0^)/
其實有開心, 亦都有唔開心, 因為我聽到達達八十四歲o既婆婆o係香港跌親, 仲發高燒 (102度), 所以 Uncle Tony 呢一兩日會飛去香港睇下婆婆, 順便等婆婆好返o的之後就接佢返澳洲....可能係佢老人家咁耐都冇返過香港唔慣o的生活同空氣, 又成日食o的油膩野所以搞到身體唔舒服囉....真係擔心死我地啦....希望婆婆快o的好返啦。
兩個百厭星
naughty boys
真係好曳, 兩個小朋友尤其係蜜柑真係搞到我筋疲力盡....每日放工返到屋企, 兩個化骨龍都會整o的"好野" 俾我嘆....等我數下佢地試過做o的乜: 將電視機櫃門 (玻璃磁石門) 成塊同我拆落o黎﹑兩個夾份打開廳個木櫃門, 拎哂裡面o的玩具出o黎﹑將廳o既落地玻璃窗簾拆落o黎﹑試過咬爛三條電話線 (由於internet用ADSL, 所以搞到幾日冇得上網)﹑打爛玻璃杯﹑仲試過自己開著電視機同錄影機再按埋錄影制幫我洗帶......
三個小朋友之中, 毛毛一定唔會做, 所以目標只係鎖定o係路飛蜜柑身上, 只不過, 我睇路飛佢咁乖, 所以都可能唔會全部係佢做, 真兇, 係蜜柑!!!!
蜜柑佢一個貓做o既野都幾可怕, 佢可以趁 Ceci 入洗手間之一剎那衝入去然後咬爛卷廁紙, 然後匆匆忙咁將咬到o既戰利品放入自己個飯兜裡面....蜜柑, 真係一隻傻貓, 佢好鍾意玩完一o的野就放入去飯兜裡面, 所以飯兜出現過玩具老鼠﹑晾衫夾﹑海綿﹑蛋殼﹑紙碎﹑繩﹑膠匙羹﹑Sink 盤塞...等等等等....如果見到個飯兜有小玩意o係度, 唔洗問, 一定係蜜柑做...佢個蠢豬....
兒童節快樂...
今日係四月四日兒童節, o係呢度祝我兩個仔仔路飛蜜柑兒童節快樂!! 繼續玩爛多幾支毛毛棒~ yeah yeah yeah~~
一早起身天氣好凍, 又落雨, 返到公司好忙冇停過, 因為由星期六起我地公司個網頁全面改革, 好多方面都有更改, 搞到我有o的手忙腳亂....
達達今日冇返工, 所以個傻人自己o係屋企又食又訓, 不知幾嘆...難為我返工返到要生要死.....
放工後去左佢度食飯, 我地一齊去 Carlingford 食....好開心又可以見到個傻人, 佢今日個病好左好多啦, 可能係休息得夠啦....希望佢快o的好返.....
阿Wing 的生日
聽日係達達個朋友阿Wing 生日所以今晚出左去同佢慶祝, 我地去左一間德國啤酒餐廳, o的野好好味呀, 好有德國特色....之後我地去左 Double Bay 食雪糕....hehehehe....好開心, 因為達達佢病左都陪左我兩日....希望佢真係快好返啦....
beer
失去十幾年的嗅覺...
諗o番起細個o既時候日日抓到片體鱗傷, 以淚洗面, 媽咪帶我睇哂全港最好皮膚科醫生, 佢地o既結論就係無藥醫, 希望我我大個o左會自動好返......到十一歲左右, 神績就係出現, 媽媽多年來每日為我o既祈禱神真係有聽, 真係好o番哂, 以後不再自卑, 可以著短袖衫見人。
其實自從十八歲離開左香港之後, 皮膚真係完全好返哂, 可能係環境空氣好啦, 幾歲時候抓傷o既傷痕都差唔多無哂。三年前返香港時我約過幾個當年患有同一種病o既小朋友 (而家個個都大學畢業啦, 唔再係小朋友) 出黎食飯, 咁多個人之中, 只有我一個可以完全康復, 佢地到大個左都係日日著長袖衫....見到佢地我真係想喊出黎, 點解佢地仲係唔可以好返? 皮膚敏感, 其實係可以好可怕.....
一向都有鼻敏感o既我一直都無正視呢個問題, 總覺得比起細個時候, 而家大個左已經係賺o左, 所以冇理到佢....活o左二十幾年, 有一半時間都係聞唔到野......其實, 呢個都係一種困擾。所以到左尋日, 我終於要去睇醫生, 我講哂俾佢聽我以前香港時試過邊隻邊隻藥, 咁佢俾左最後一隻藥我試, 如果都係唔得, 我就要做手術...
回想起細個, 我而家真係好好彩, 感謝神, 因為係佢醫治我, 而家我仲可以養兩隻貓貓都冇問題....希望我幾個當年 "戰友" 可以快o的好返啦....
April Fool...
今日唔知點解心情好好, 朝早起身搞點哂O的野再煮個出前一丁, 再錫幾啖香噴噴O既路飛蜜柑先出門口, 都早左15分鐘到Bondi, 一去到就搵到個靚位泊架車...嘩...泊得真係靚....跟住早左10分鐘返到公司...達達今日病得好厲害, 佢請左三個鐘頭病假...之後佢返到公司都係好病, 所以又早左幾粒鐘走....真係好擔心佢....好唔明點解同佢一齊咁耐, 佢就病足咁耐...一病接一病.... :(但係佢每一次病都傳唔到俾我, 真係奇怪....可能係我每日KEEP 住食維他命 C 啦....其實食維他命 C 真係可以增强抵抗力...對於O的唔食生果O既懶人O黎講就更加要食啦... 好似食橙汁糖咁之嘛...如果唔食維他命C而病左要食藥, 咁就仲慘啦....唉....其實我之前身子好弱, 成日病, 咁點解而家會少病呢? 細個O係香港O既時候媽媽成日迫我食生果, 但係自己住冇媽媽迫我, 就只好用懶人方法囉....唔係點呀? 死得啦....
有感而發
貓對人來說, 是生命的一部份, 但人對貓來說, 是生命的全部。
有很多人養貓, 都是抱著很不負責任的態度, 認為貓只不過是一種玩賞的寵物而已, 完全沒有尊重過他們的生命。這是一種悲哀。很多人的養貓觀便是 "我是你的主人, 你住在我家裡便要完全遵守我家規", 如果貓貓做了一些主人接受不了的行為便會打駡他們。在飲食方面也完全沒有小心地選擇合適的糧, 隨便地給予一些含防腐劑和肉副產品的垃圾肉類貓糧。
貓貓住在我的家, 這家便是他們的, 是家裡的成員。而我, 其實就是住在他們的家, 做他們的貓奴。他們要對家裡的東西做什麼, 我也不能說什麼。所以我家裡沒有危險的東西擺放著, 例如插了花的花瓶, 吊吊的裝飾...等...
如果貓貓推倒了一個玻璃杯在地上打破了, 你也不能怪他們, 因為他們不曉得, 要怪, 只好怪自己沒有好好把杯子收起, 並且應該責罰自己, 因為貓貓可能隨時誤吃地上的玻璃受傷或死亡...所以絕不是他們的錯, 而是自己的錯。
我在跟貓相處之道上, 還有很多方面有錯, 有些事口講容易, 做起來便是另一回事。所以, 我希望自己能夠不負身為他們母親的身份, 好好地愛他們, 在他們有生之年活得幸褔快樂。因為路飛蜜柑雖然是我生命中的一部份, 但對他們來說, 我是卻他們生命的全部。
