沙灘貓的私家海灘: 5月 2005

有冇搞錯小朋友真係好曳!!!

我初時以為咁樣 --->

已經係到了貓奴忍耐主子們的極限。
可惜, 剛剛我去左沖涼, 點之沖完涼出個廳諗住話飲杯水啦, 我見到個電視機↓

無奈, 電視仍然o係在播放著....
路飛蜜柑!!!! 你地同我企係度!!!!!

哭成淚人

我是一個感性的人, 對生離死別, 尤其哭得更甚...
今天放工回家, 看到小茵在板上的留言, 憶述叮叮怎樣在臨別前幾日, 帶著疲憊不堪的身軀向每一位愛她的家庭成員道別, 我忍不住了, 我哭了....貓真的是會這樣做。叮叮在病發後, 即前幾天, 先在媽媽小茵的懷裡依在她睡, 然後分別每天都會找家中的每一個成員, 輪流地在他們身傍休息...也替自己的親生兒子炭炭舔毛梳洗, 好像是要跟各人道別﹑準備上路....也好樣是叫家人不要替她難過...她會在彩在橋好好生活, 繼續照顧先到了那裡的小孩們小背心和肥b...在昨天, 即是最後一日, 叮叮好像在叫媽媽不要太擔心, 勉強地喝了些奶...
今天炭炭開始發覺媽媽不見了, 在喵喵喵叫...
炭炭要乖乖啦, 小茵子都要努力照顧炭炭啦....

叮叮。
(這裡借用了小茵子的相片)

再見了, 小茵的叮叮

彩虹橋再會....

關你"鬼"事

尋晚五點出門口接達達放工, 跟住我地去左Randwick買左好多零食返屋企。嘻~~ 之後我地o係屋企留到七點就去左 UNSW 大學聽一個林以諾牧師o既佈道會, 題目係「關你"鬼"事」...內容就當然係講有關於靈界啦...
一開始就有一班unsw o既詩歌班帶領唱詩, 我覺得氣氛唔錯, 其中有一首詩歌特別摸著我, 唔知點解, 一唱到o個個位, 眼淚就忍唔住流出來, 而坐我後面有兩個人我都知道佢地在同一個位都喊左出黎, 眼淚仲滴左落我個位度....其實感動係因為真係講中我咁多年來o既經歷, 每一次我遇到困難﹑錯折﹑我的好朋友主耶穌都會給我力量和勇氣去帶我走過。又或者遇到我自己認為是不美好的事情, 其實望回頭, 原來都係美好的, 而且係更美好...我雖然唔係一個虔誠o既信徒, 無返教會, 無讀經, 好少禱告, 但係我知道主一直都在保守著我, 我知道佢一直等著我回到佢身邊, 不過我唔乖, 唔聽話, 傷左佢o既心....
好啦, 講返正題, 詩歌之後, 跟住就係林牧師講道啦。佢當然又係用棟篤笑形式啦...真係笑死人...當然啦, 唔係所有信徒都接受佢講道o既方式, 不過唔理點都好, 褔音總算係傳左出去, 我相信神會作工....
完左個佈道會之後, 我地就返屋企啦, 天氣好凍呀....我地返屋企食零食...嘻~~~

update小朋友們的新近況

最近, 天氣變凍了。冬天, 除左凍之外, 仲好乾燥, 小朋友都好似飲多左水水...

<--(小朋友飲水器)

路飛, 依然係肥仔飛。可能又係因為冬天, 動物o既本能係: 食同訓。而路飛亦係墮入呢個category, 所以佢最近好似又重左...毛毛都係一樣, 天氣凍, 食多左野, 肥左.....
而蜜柑係一隻好特別o既貓, 佢o既陽光男孩性格絕對唔會被寒冷天氣所掩蓋, 依然係咁陽光。所以佢食多左野, 但係又多運動, 所以佢冇重到, 反而, 我同ceci都覺得佢細隻左...真係"r"哂頭...
講開蜜柑, 真係覺得佢越來越百厭, 係一個不折不扣o既naughty boy。佢好鍾意搞到間屋亂哂, 打爛o的野, 推跌o的野, 如果個杯裡面無水, 佢通常唔會走去玩。但係如果個杯裡面有水, 佢就一定會推跌個杯。你千萬唔好俾佢入洗手間, 因為佢知道洗手間入面有佢最鍾意玩o既廁紙同髮夾, 蜜柑可以o係五秒鐘之內同你摧毀所有東西...你鬧佢嗎? 佢一定會駁咀, 點樣駁? 嘛係吱吱吱吱咁叫, 擺明就係唔妥你。用貓粗口鬧返你轉頭, 問你怕唔怕? 不過蜜柑最鍾意都係同貓玩, 但係路飛﹑毛毛又唔 show 佢, 點算? 好簡單, 趁佢地訓著覺去突襲佢地囉...搞到其他貓都怕左佢。
我講蜜柑咁多野, 都唔係想講佢係一隻惡貓。佢只不過係百厭﹑貪玩﹑想引人注意﹑到處生事...等等.... <--百厭樣一個

而我o既大愛子路飛, 佢永遠都係家中o既親善大使即使你點"整" 佢, 其他貓點"蝦" 佢, 佢最多都只不過會 "哇" 一聲叫, 絕對唔會"吼~" 或者 "fee~~" 之類。自路飛出世以來, 我真係未聽過佢"吼fee~"過一聲....反而蜜柑到左極點就會露出貓本性地 "吼~fee~"...
路飛佢仲有一樣最可愛o既地方就係好鍾意咁 --->
佢可以反轉個身訓, 一個晚上之久都得, 真係服左佢...

好兄弟? 死對頭? (其實通常係蜜柑先撩打, 但最後都係唔夠打)

肥飛飛和小柑柑

收到一個好傷心的消息

今早, 本來應該心情好好, 係一個好好天氣o既星期六。但係一去到電腦, 打開個谷一睇, 惡耗傳來--叮叮, 證實患了FIP...
肥b之後, 就係佢親生媽咪傻叮都係患了FIP...
小茵一定好傷心, 小背心之後就係肥b, 都係同一種病。小茵你一定要加油哦, FIP 雖然係絕症, 但係都有醫治機會。我地所有人都會為你打氣﹑為你許願。希望叮叮可以好返, 同炭炭一齊再打交!!
加油, 我同路飛蜜柑會支持你, 叮叮﹑小茵!!

Olive, 路飛, 蜜柑上

買新相機

尋日同Mika 飲酒, 其中一個話題係講到我想買部新DC。至於單鏡反光機咁貴我又唔係太識玩相機之人, D70之類o既機都係冇我份架啦....

今日上個版睇到 Canon 終於出左部我幾鍾意o既機 S2 IS, 佢同 S1 IS 份別在於佢有防震系統+12倍變焦, 呢個同 Minolta o既Z5 同級...而S2ISo既焦距為統菲林相機o既 36-432mm 再加上全新0 cm 超級微距拍攝模式, 呢o的都係Z5級不上o既地方...雖然S2IS機身比Z5重 100克, 但體積就比 Z5 細小, 再加上點睇S2IS 都係靚仔過Z5....價錢大約係HK$3980左右, 因為係新推出, 希望佢快d跌價啦....

平機票呀!!

今日返工達達打電話俾我, 佢話終於出左特價機票, 係維珍航空兩個人加埋連機場稅都只係 AUD$1130 咋....真係未見過d咁平o既機票, 真係心郁郁呀...不過咁, 呢隻機票只係限於 21 日來回, 所以我地返香港唔可以停留多過 21 日....本來諗住6月26日返香港, 而家都可能因為一o的私人理由唔可以如期返港, 不過我地七月一定會返到!!! 所以各位香港o既朋友請再稍等一下, 我就返架啦!!!
今晚同mika一齊飲酒, 好開心!!!

今次去睇"屋"?

又係好多日冇寫日記啦, 上個星期五達達同舅父黎我屋企打邊爐, 天氣凍嘛...打邊爐最o岩!!
星期六, o係屋企拾屋, 拾到自己間房好鬼死乾淨...i love it! 跟住晚上就同達達去行街睇戲食飯...
星期日我地約左阿婆同細舅父去飲茶, 仲同細舅父傾左好多關於買樓o既事, 因為佢有好多意見...跟住我地一行四個人去左 Homebush Bay, 即係 Olympic Park 以前o既選手村, 果度起左好多新樓, 係一個新發展區....初時我唔係太喜歡果區, 因為話哂都係近住工業區...但係一入左去個村, 就好似入左去另一個世界一樣, o的屋好colorful, 好靚, 街道又整齊, 好似一個個顏色小方盒一樣, 好得意...又有一個人工湖, 環境睇黎唔錯...
跟住我地去睇示範單位, 嘩...我地一睇就好鍾意, 一間獨立屋, 全新, 複式四面有花園, 電動車房, 有三房﹑三個洗手間, 兩廳...價錢 from 三十五萬至四十五萬, 而我地睇中o既就大約四十萬左右...真係同上次睇北區o既單位差唔多價, 但係呢度就係一間屋, 唔係一個單位....
睇完之後又心有郁郁...不過我知我地仲有好多 choice, 下一次睇樓我地會睇南區...
好想快d搵到呀, 我地o既 Dream House....
今日星期一, 又係返工日啦, 夜晚達達又黎我屋企食飯...開心!!!

誓辭

我八歲那年秋天, 一個晴朗的星期天, 爸爸帶著我在何文田一帶散步, 不經意來到英皇佐治五世學校, 那裡我第次一看到棒球比賽。這是一個比大足球場還大的大草地, 大半邊緣生長著密林, 一邊是一字長形, 古老帶灰色的校舍, 中間有一座鐘樓。校舍前面就是級數不多的看台。我那天看到的場面, 好像嘉年華多於球賽: 熱鬧﹑緊張﹑叫喊聲和笑聲混雜, 小孩子跑來跑去, 生氣勃勃。有些一家大小就在場邊吃便當, 像郊外野餐一樣。

但叫我留下更深印象的, 是他們每場比賽前的宣誓儀式。這時候小球員就不隨便了。他們把上衣統進褲頭, 整好衣裝, 脫了帽子, 用雙手放在胸前, 兩隊整齊的列成"V"型列隊。"V"字的底部站著三位裁判。然後, 其中一隊的一個球員走出來, 站在"V"字當中, 開始唸誓辭。他一句, 大家跟著唸一句。氣氛莊嚴。有些站在場外的大人也脫了帽。唸完最後一句, 兩隊向對方一鞠躬, 就跑回自己的地方。不久, 比賽開始。

三年後, 也就是我十一歲那年, 父親答應我參加少棒。我們向《熊貓》隊申請, 幸運地被接納了。這時候, 我才第一次知道三年前給我深刻印象但不知道內容的少棒誓辭。

原文是英文, 我把它抄在下面:

I trust in God,
I love my country,
And will respect it's laws.
I will play fair,
And strive to win.
But win or lose,
I will always do my best.

我嘗試把它翻譯成我們的語言, 和大家分享:

我信神,
我愛我的國家,
並且遵守她的律法。
我矢志格守體育精神,
並且努力去爭取勝利。
但不論勝或敗,
我必全力以赴

最後兩句父親曾經譯過, 我這裡就用了他的譯文。這篇誓辭很短, 原文只有31個字。但內容豐富, 很有感情。字裡間, 隱隱有一種誠懇﹑勇敢的氣質。

我現在已不再在少棒場上了, 懷念昔日一起流汗的隊友, 啟蒙教練和叔叔姨姨們。但至今和我在一起, 常常提點激勵著我的, 依然是當年那篇短短的誓辭。每當我遇到困難或者有不愉快的時候, 那些字句就在心裡冉冉昇起。

．摘自《上壘》第十一期 1995．12
作者曾效力《熊貓》少棒隊(隊長)﹑《雷霆》青少棒隊(二壘手), 以及《奔豹》少棒隊及中文大學棒球夏令營助教。父親為香港棒球總會總編輯。

誓辭

捕手

後期之《熊貓》隊合照

今晚打邊爐

我好少O係返工時間打日記, 因為今日實在係太...悶啦, 所以都打下日記打發下時間啦....
今晚達達同UNCLE 會黎我屋企打邊爐, 我尋日放工後已經去買哂打邊爐要食既食物啦, 而且仲洗埋菜...今晚一返到屋企人齊就可以開爐LU....
天氣好凍呀, 今日雖然冇尋日咁凍, 但係都仲係落住毛毛細雨, 都好寒架....打邊爐最合時!!
YEAH~~~

天氣好凍得要命~

今日毛毛細雨,
冬天﹑寒冷
早上﹑懶床

每個朝早起身後都會見到客廳一番新景象,
小朋友﹑搗亂檔
路飛貓﹑哇哇叫
蜜柑貓﹑喵喵叫

不過今日起身後, 見到兩個小朋友凍到癡埋一舊, 取暖...

我相信係入冬後最凍一日...

放工﹑搵達達, 一齊食飯...開心...嘻!

路飛呢一刻﹑訓覺

有人今日好開心?

今日對我黎講又係冇乜特別o既一日, 都係照常返工, 放工...達達佢有打電話黎我公司, 不過我都好忙所以冇乜點傾計...
我知道, 今日對拍直黎講, 係o既興奮又開心o既一日, 因為佢女朋友 Cathy 黎澳洲探佢, 之後佢地會去 Tasmania 玩幾日...拍直今日要還佢架 SS 啦, 唔知佢會係咩心情呢? 呢架陪左佢兩年o既大車...嘻...我當然好唔捨得啦, 因為我地又少左好多免費車左lu...以後仲要慢慢還好多"車債" 俾拍直...

而家我打緊日記呢一刻, 路飛正o係度搞緊我...我睇唔到個 SCREEN 呀!!!!!!
依~~~路飛!!! 俾媽媽打幾隻字先啦!!!!!!

嘻~ 多謝阿jane 同Tommy俾我o既留言呀....遲o的要麻煩你地啦...hahaha....

挪亞方舟

今日係星期日, 又即係訓晏覺既最後一日...尋晚返到屋企之後就同達達睇上次林以諾牧師黎 Sydney o既佈道 (Stand Up Sydney) 既 VCD, 因為果陣時達達有去幫手, 所以有教會既朋友送左套紀念 VCD 俾佢。
今日都冇做到咩特別野, 不過夜晚就同達達去左睇挪亞舟驚世啟示。因為又係果個教會朋友俾左兩張戲飛佢, 所以就同我去睇...都幾好睇架, 又係影音使團既作品...
聽日又要返工啦, 不過聽日會好唔同, 因為我同老闆再三商量之後, 決定請我個 friend Jano 做 part-time, 咁我就可以有個幫手啦....
達達呢幾日隻牙唔舒服, 聽日佢就去睇牙醫....希望冇事啦....

今日係最後一次...

今日係最後一次坐拍直o既 Commodor SS 啦, 因為佢星期二就要還車俾公司...有d唔捨得佢架車呀...當然啦, 好舒服架...而且我地都坐過呢架車去短途旅行...佢都楂左呢架車兩年啦...唔捨得呀...

今日我地去食飯唱k, 好開心, 跟住去食糖水!!!

人生大事

三日冇寫日記啦, 我知道有o的人等到頸長埋...好啦, 等我今日再寫日記啦。
今日, o係度要同大家宣佈一件事, 係一件好開心, 好開心o既事: 就係我終於應承o左達達出年同佢結婚。呢個唔係一時o既決定, 因為都考慮o左一段時間。你問我開唔開心? 我當然萬分開心啦, 相信我地永遠都會好開心。

係呢度要再次多謝達達o既小學同學 Esther, 仲有拍直, 佢地一直都有支持我, 仲有多謝佢地幾日前寫俾我o既留言, 你地真係抵死...拍直, 你話要收媒人利是嗎? 睇過點...

小朋友冇枉管之"傻"日記 (一)

(1) 路飛: 好悶呀, 細佬我地玩乜好呀?

(2) 路飛: 不如我地玩飲奶遊戲丫...你扒嚮度扮俾我飲奶奶丫....

(3) 蜜柑: ........(無奈)
路飛: (啜啜啜啜...摺摺摺摺....)

(4) 路飛: 依? 有靚女行過, 細佬, 你唔好望呀, 靚女冇你份, 等哥哥上啦...

(5) 蜜柑: 有靚女? 唔得呀, 我要睇我要睇 (掙扎)!!
路飛: 唔得呀~~!!! 你個反骨仔想點呀, 唔准走!!!

(6) 靚女毛毛: 你地邊個叫我~~~? (非常可怕的樣子)

(7) 蜜柑: (怯~~滴汗) 唔係我叫你呀...呵呵~~ (扮舔毛舔毛...)

喉嚨痛得要死hey

今日個喉嚨仲係好痛, 好似越來越痛...吞口水都好辛苦, 講唔到野呀...
返工返工...好忙呀...冇時間病...o係藥房買左盒 Strepsils Anesthetic Plus, 以為可以只到痛啦, 點知一o的用都冇....好辛苦呀

今晚唔可以同達達傾電話啦, 因為真係開唔到聲

祝自己母親節快樂 =.=

今日係母親節, 路飛一早就喵喵喵~ 同我講第一句母親節快樂...嘻~ 蜜柑雖然冇講, 但係我知道蜜柑係鍚媽媽o既, 所以佢一早見到我就好似滾地葫蘆咁o係我面前碌來碌去....好鬼抵死

尋晚好開心呀, 達達放工之後就黎我屋企食飯, 我煮左好多好味o既送菜同湯...食到佢停唔到口呀~
跟住我地睇帶, 睇繼續無敵掌門人...仲有食雪糕

今日一早我同達達去左探婆婆...佢好精神呀, 見到我地黎探佢仲好開心tim....我見到阿婆都好開心, 因為我自己婆婆早過身, 所以好羡慕有婆婆鍚o既人....今日係母親節, 所以兩個舅父都同婆婆慶祝, 我地六個人一齊去Ashfield食飯, 睇到阿婆佢好開心
之後達達同大舅父送我返屋企, 經過Kingsford 順便去左食糖水, 我食左一個芒果紫米露, 達達食左一個海底撈o野, 大舅父佢呢個糖尿病人竟然大膽地食左個什果西米露...睇黎佢食得好開心

星期六在家休息的一天

首先好多謝 Esther o既留言, 我好返好多啦 (身同心)....只要休息多o的同埋食多o的有營養o既食物就會好快好返

希望快o的到六月尾返香港就可以見到你啦....

今日訓覺訓到十點, 好耐都未試過訓到咁晏啦, 雖然路飛有八點有搞醒過我, 但我都好快再訓返...嘻~
好鍚路飛﹑蜜柑, 所以今朝早同小朋友玩左成日上午...如果佢地可以跟住我一生一世就好啦...可惜生命短暫, 所以我會俾佢地最最最幸福的家...i love u 路飛蜜柑

頭先去左買菜, 因為達達今晚會來食飯....

病假一天

09:00am: 路飛好早就叫醒我, 佢留左好多口水o係我張床上面。悶...唔想咁快起身, 開著電腦聽絕情谷....

10:45am: 起身刷牙沖涼, 個喉嚨仲有血, 深紅色血塊....

12:40pm: 洗完衫, 幫小朋友換砂﹑梳毛...又坐o番o係電腦前....覺得好唔開心, 點解我呢兩三個禮拜挨咁多苦, 病咁多次, 入咁多次醫院, 加上又請咁多病假 (等於無收入), 我都要學識堅強。即使有幾多痛楚, 我都會挨過....但係有人就成日埋怨想死﹑要離開呢個世界? o岩o岩聽完倪震, 講到有一對夫婦, 有一個9歲大﹑患有絕症o既女, 別人會覺得佢地好可憐, 要照顧一個隨時可能會離開佢地o既女, 但佢地就覺得自己比任何人都幸福快樂, 因為佢地每日同囡囡溝通o既時候, 得著o既永遠係最好。珍惜眼前人, 要給予眼前人最大幸福快樂, 即使人生在世總會別離, 若果係活得精彩﹑o係人生o既道路上種滿燦爛的鮮花, 我覺得係不枉此生.....我絕對不能理解點解有人有健康﹑有幸福﹑有好多人鍚佢﹑關心佢﹑有好好o既生活, 仲要諸多埋怨, 經常將 "死" 字掛在唇邊呢? 呢o的野, 絕對不能隨口講, 當作等閒笑話。因為愛佢o既人聽到會好傷心, 好傷心....

3:30pm: 頭先去左 Eastgardens 買野。而家屋企煲緊紅棗雞湯...臨出門口之前同拍直傾左一陣電話, 因為佢知道我唔開心...順便打電話黎問候下我。路飛蜜柑訓緊覺 ZZZZZzzzzz....

8:00pm: 而家飲緊煲好o既黨心紅棗雞湯, 雖然唔係咁鍾意黨心o既味道, 但係身體弱, 要飲o的保湯 (但係又懶買煲湯料, 屋企有n年前阿媽俾我o既黨心)....達達頭先同舅父黎我屋企一齊食 pizza....

Depress

今日朝早去醫院覆診, 放工後要再去過, 因為要做麻醉...
好唔開心, 諗起死去O既親人, 請不自禁哭了出來....
心情好DOWN....

******************************
寫於晚上十時四十分: 手術後, 達達接我出院返屋企, 坐左一陣佢就返左自己屋企啦, 因為聽日佢同舅父都要一齊返工...頭先一直個喉嚨好痛, 將痰吐出來, 全部都係血......好多﹑好多...血...

期待放工的一天

今日照常返工, Val 開始熟識我地公司運作, 遲o的佢會同我開會討論究竟有乜野要改善...佢話有好多野都要改善, 我聽到當然開心啦, 我會盡力協助!!
達達今日都打左幾個電話黎, 後來佢話想放工後去 Bondi 搵我食飯喎, 梗係好啦, 好多日冇見過佢啦

我地今晚一齊去食日本野, 好開心, 估唔到唔使等friday night 都可以見到佢....食完飯之後我地就各自歸家啦...

好勁o既人呀~

老細阿Marc 五月廿七日就要放一個月大假啦, 所以佢好有面咁請佢左一個"好勁o既朋友" 幫佢睇住盤生意, 即係話, 呢個"好勁o既人" 將會做我一個月臨時波士....
呢個"好勁o既人" 叫阿 Val, 尋日開始黎我地公司返工, 唔講唔知, 原來佢真係好勁架, 以前o係政府部門做過高官, 又o係幾間澳洲大firm 做過行政總裁 (Managing Director)....諗極都唔明, 點解Marc 會識得咁多勁人? 識唔係問題囉, 仲係請到佢黎我地公司做兩個月Temp job, 真係有面....
而我當然好開心有 Val 同我做拍擋啦....因為 Andrew Morris 做埋今個星期就要走啦, 佢搵到份 State Government o既 job, 其實講開 Andrew, 佢又係一個有料之人, 佢以前o係國防部聽講做得好大粒 (呢個係我國防部o既aunty 講我聽o既), 佢呀, 個人又歉虛, 又低調, 真係好鍾意o的做事作風咁乾淨o既人。
而家 Val 係我好朋友, 佢真係一個又老實, 又有 charisma o既人....好 charm 呀~~~~希望我會o係 Val 身上學到功課, 因為佢 manage business 好有一套, 我今日同佢討論 Tom Peters 都講左成個下晝....佢真係又有理論, 又 practical....我而家每日返工都會好開心

估唔到我地小小公司, 入面全部都係勁人。 Marc 就當然勁啦, 佢 set up 呢個 business, quit 左以前大公司俾佢勁高年薪o既工, 而家我地公司係全澳第三大 online pharmaceutical trading company。而我呢? 我最差, 不過點講都好, 我都係一個 Master of Logistics...哈哈...
尋日達達佢夜晚訓唔著, 3:30am 打電話俾我, 話掛住我喎....不過我好快又訓返...嘻~~
三日冇見過佢啦, 各有各忙, 住得又遠...希望快o的到 friday night, 咁我就可以見到佢啦

久休復出

請左成個禮拜病假, 今日終於要返工.....真係好唔想返工呀, 不過唔返又點維持生活呢? 唔通睇住自己冇屋住, 小朋友要訓街咩? 所以今朝早抱住十萬分唔願意o既心情走上去 Bondi (公司) 的路.....我從來冇發覺原來 Bondi 係咁近 Maroubra (我屋企), 點解條路唔遠o的? 點解唔塞下車呢? 唉....搞到我仲早到, 真係慘

返到公司, 就當然好多人問候我啦....出自真心又好, 禮貌上問下又好, 我都係俾每個人同樣o既答案....今日, 我真係唔想多講野.....
做做下野, 又覺得其實返工都幾有意思....哈哈...我個人真係五時花六時變呀.....心情又開始轉好, 可能係冇返工咁耐, 第一下一定會抗拒...嗯嗯嗯~~
今日蜜柑好洩, 佢打哥哥路飛...又打家姐毛毛.....蜜柑!!!!!!!!!!!!!!!!!!!!!!!!!!!!!!!!!!!!! 你同我罰企!!!!!!!!!!!!!!!!!!!

達達的生日 party

小朋友們同爸爸影的合照

尋日係達達生日party, 我地請左拍直, wing, jane 同佢肥老公 tommy 黎我屋企為佢慶祝生日。

我地無打算出街食, 所以我準備左 ceasar 沙律﹑肉醬意粉﹑鹽焗雞翼。簡簡單單o係屋企煮野食都唔知幾好 ^_^ 最緊要佢地可以黎睇小朋友嘛.....
之後, 我地當然有切生日蛋糕啦....係風月堂o既香芋蛋糕, 好好好味架 ^+++^
我地之後去左 VIVA唱K, 由 9 點唱到 12 點....真係好耐冇唱得咁盡興啦!!!!