路飛蜜柑出浴之夜...
今日放工有達達同舅父接我, 一齊去 Kingsford 食飯...達達佢聲稱病左, 喉嚨痛同埋好累, 可能係開始作感冒, 但係舅父叫我唔好信佢, 話佢係搏同情喎....不過我睇佢真係病o既....所以佢黎到我屋企食左粒 Panadine 先走, 而舅父又乘機玩貓....
佢地走左之後, 我突然間好想同兩個化骨龍沖涼, 所以就"的"起心肝決定今晚同佢地沖哂....
首先係路飛, 然後蜜柑...真係累死我啦...而家隻手仲係好震....腰酸背痛....最辛苦就係同佢地吹乾, 再加埋佢地既掙扎同出爪, 真係要命....
佢地而家香濆濆啦....難為我呢個貓奴 + 廿四孝媽咪 一_一
Bondi 肥貓....
今日係假期後第一日返工, 個人就當然係十萬分唔願意啦...無計啦...現實就係咁殘酷....
返到公司, 驚嚇o既場面其實一早預左, 好辛苦, 挨到五點半但係發覺仲有好多野做所以六點先走 (其實都未做完)....
我帶住極度疲倦o既驅體行去拎車, 經過o的住宅時突然之間有隻大肥貓走出黎企係我前面, 佢好好好得意架....我即刻同佢玩, 佢猛咁嗲我囉, high o下 high o下咁, 好鬼抵死....同佢玩左 10 分鐘, 我要走啦...於是行啦, 點知佢跟住我囉, 我叫佢唔好跟住我, 返去自己媽媽度啦, 佢唔聽我講, 都係要跟住我行, 我慢行, 佢慢行, 我快跑, 佢又跑....我停, 佢就行過黎 high 我....真係要把我殺死啦....好得意呀....
咁我行到自己架車度時候要過一個馬路, 我同佢講, 姐姐要走啦, 聽日再同你玩, 你唔好跟我過馬路啦....點知, 佢都係要跟我過囉....就係我過左馬路之際, 佢仲未過到o既一刻, 有架藍色o既 Mini Cooper 開住燈快速駛來 (當時個天都八成黑哂), 我見隻肥貓望住架車呆左企係路中心囉...嚇死我呀 !! 我即刻諗都唔諗衝去救佢囉, 好在架車 dup break, 如果唔係我會攬住肥貓一齊入醫院囉....真係嚇死我.....
Bondi 肥貓
最後一日復活節假期之休息日
唔開心, 因為今日係四日假期o既最後一日....
由於尋日去 Easter Show 玩得太累, 所以今日都係用o黎休息....
朝早起身都係同舅父食個牛肉粥炒麵奶茶早餐啦, 跟住我同達達就去左睇車兼 test drive....達達佢話年中想買新車喎, 所以而家都係睇下先, get 一個 idea咁上下....我地去左 Citroen 睇 C3, 仲 test drive 左一架開蓬o既 C3 Pluriel, 睇落真係好好, 我地兩個都好鐘意, 而達達就尤其鐘意 sky blue color特別版, 價錢都只不過係二萬六至三萬澳元咁上下, 不過 drive 過之後又覺得感覺一般啦, 可能因為半自動波再加上係歐洲車, 起步轉波 pick up 得比較慢....都係我架日本車仔 Mazda2 好 一_一"....
買車o既野唔可以急o既, 我地有機會再比較多幾款車, 希望達達可以買到佢想要o既車啦...
其實諗下諗下, 我地究竟係買車先, 定係買樓先呢?
噢....現實就係: 我地兩個聽日都要返工.....
第四日 ~完~
C3 Pluriel
第三日復活節假期之Royal Easter Show !!
British Short Hair @ Easter Show
今日終於到左一個假期既高潮, 亦係假期o既第三日, 今日, 我地去左 Easter Show !!
好開心, 因為天氣好好, 冇雲, 冇雨....我地早上去接拍直一齊食個早餐, 跟住就從 Parramatta 搭火車去 Olympic Park。好多人呀....梗係啦, 今日天氣好, 又係星期日, 應該係成個 Easter Show 最多人去o既一日....好在我地唔洗點等就入到會場啦....入到去, 真係花多眼亂, 唔知道由邊度玩起先...不過我心裡面最想去o既一個地方當然就係 Cat Show 啦....開心呀....好多貓呀, 我仲可以抱到一隻 Blue Color o既英國短毛貓b呀 (見上圖)....勁勁勁開心死囉 >o< 真係死而無憾呀 !!! 除左貓之外, 我地仲有睇好多其他動物例如狗狗啦﹑牛牛啦﹑羊咩咩啦﹑馬馬啦﹑豬豬啦...等等.... 我地仲有去睇豬跳水同豬賽跑...勁搞笑囉....其他 show 例如砍木比賽, 越野電單車花式表演等都好好睇.... 睇完o的show, 我地去左o的遊戲攤位玩掟公仔, 我好易就掟左隻 SpongeBob 公仔啦...hehe... 至於機動遊戲, 雖然係好想去玩, 但係好多人囉, 所以都冇去玩....最後, 我地當然就去買 Show Bags 啦....達達買左一個 show bag 背囊俾舅父, 而我同拍直都揀唔到想要o既 show bag :( 今年o既 Easter Show 好開心, 因為係第一次同達達去嘛.... 第三日 ~完~
第二日復活節假期之行街街...
第二日假期, 出太陽加毛毛雨, 陰晴不定....我同達達一早起身去左 The Rocks 食 pancake 早餐, 跟住就去左 chinatown行左一陣, 行下食下....好開心.....好耐都冇行過街啦....之後我地返左達達屋企煮野食, 仲有James都有黎食飯.....今日就算係比較 relax o既一日, 聽日就要去 Easter Show 啦....希望唔好落雨啦.....第二日 ~完~
第一日復活節假期之野外BBQ
Lane Cove Nat'l Park
今日係第一日復活節假期, 天氣好好, 原定o既BBQ可以如期進行....一大早我地就去到 Lane Cove National Park, 因為係 Public holiday, 所以好早就要去霸爐....去今次燒野食o既人有: 達達﹑達達舅父﹑拍直﹑加菲媽Kidy﹑Mika & Moscow, 仲有阿 Sam & 佢老婆 + 兩歲大o既囡囡....嘩, 一共有9個人加一個小朋友呀 ^_^....不過最可惜阿 Sam一家要早走, 如果唔係可以同小朋友玩多o的嘛....我地BBQ所以肉都係拍直媽咪替我地預備架....真係好好好好味....有南于雞翼﹑沙嗲雞串﹑各款丸丸﹑牛柳....而 Mika 就整左個 Banana Cake 都好好味架....Kidy就當然有帶佢部 300D 出黎影相啦....o的相影得真係靚....大家都玩得好開心 ...BBQ 完左之後, 大家就去左我屋企打麻雀順便探下路飛蜜柑毛毛啦....hehe....路飛即場表演反肚絕技引來全場焦點呀....叻仔...媽咪鍚鍚....今日真係好好玩, 大家都好開心...yeah~~第一日 ~完~
好天氣
今日O係OFFICE真係好悶呀, 終於忍唔住幫自己部電腦 DOWNLOAD 個倉頡輸入法等我可以打下中文嘛....HAHA....
而家O係公司 "HEH" 囉....做咩呀? 聽日放四日HOLIDAY 啦....尋日仲係橫風橫雨, 今日就藍天白雲....個天真係玩野呀....
好掛住路飛蜜柑...唔知佢地O係屋企做緊乜呢? 嗯....
聽日去BBQ啦, 好野 ! 加菲媽同MIKA 都會去呀....好開心 !!
而家仲有四個字三點...要等到5:30PM先放工....達達會O黎車我...^_^
橫風橫雨....
呢兩日Sydney橫風橫雨, 加上天氣突然變凍 (氣溫大約十幾度), 真係好 "蚊憎" 囉.....
尋日本來打算放工後返屋企訓覺, 點知個天變得好快, 落o既唔只係狗屎囉, 我諗係恐龍屎加怪獸尿....慘啦, 我又冇帶傘, 點返屋企呀? 不過有傘都冇用, 因為o的雨個打橫吹囉......跟住個人又累又想作病...達達佢擔心我, 所以o黎車我放工...嘻....佢話呀, 我好幸福喎....
今朝係達達車我返工, 同 uncle 一齊o係 Bondi 食早餐 ^_^....真開心....
近排達達俾我感染到, 鍾意聽絕情谷, 我以前有叫佢聽架, 佢話有乜好聽喎....佢而家鍾意叫我 burn 俾佢放o係架車度聽....一路開車一邊聽, 又真係幾好笑, 連 uncle 都鍾意聽....自從同達達一齊之後, 我都好少聽呢個電台節目啦, 因為時間少左囉....冇得聽, 生活都好似差梗一o的野...嗯....是的是的....
今晚同卓頌恩搬屋, 跟住我地去食糖水, 我食左個雪耳燉木瓜, 佢就食左碗紅豆沙....
真係好累呀, 好啦, 我都要早o的抖啦.....
好憎o既星期一 >.<
又到星期一, 真係好憎呢一日, 因為星期一永遠係最忙o個日....由於 Easter holiday 快到, o的船期要改早一日, 搞到本來已經係好忙o既星期一再忙多幾錢重...真係要命....由於太忙太緊張, 搞到個胃又痛啦 >.< 本來諗住做完野放工就返屋企, 點知達達個傻人又無端端打來我公司, 話接我放工喎....本來真係想早o的返屋企休息架....不過一諗到又可以見到佢咁就梗係....嘻~~ 最後我地同舅父去左 Kingsford 食飯, 跟住就返左屋企啦....今晚要早o的訓呀, 因為真係好累~
走了...
今日達達o既媽媽同婆婆撘飛機返香港啦, 希望佢地平安到達啦...
尋晚同達達屋企人去食 Korean BBQ, 因為係臨走前o既 dinner, 所以出去食...不過婆婆好似有好多心事咁, 佢八十幾歲老人家其實真係唔想出門架, 仲要撘咁多個鐘頭飛機...希望佢今次去香港平平安安去, 平平安安返啦....真係有o的擔心, 雖然話係去一個月...
今日我同達達同拍直去 Macquarie Center 睇戲, 跟住接埋舅父一齊去 Blackstump 食牛扒...好開心 ^_^
聽日又要挨驢仔啦...唉...唔緊要啦, 返埋呢四日工就有 Easter holiday...yeah yeah yeah~
Florence 入醫院....
尋日返公司見到 Florence 個樣好唔妥, 佢話肚痛, 痛左成晚....初時我唔為意, 但係望望下, 見佢真係好唔掂, 於是我叫佢去睇下醫生啦, 點知, 醫生話佢可能係慢性盲腸炎, 要立即入院...
夜晚我打左個電話俾佢, 佢話岩岩照完, 好痛, 醫生有同佢打嗎啡....但係都仲係超痛....佢電話把聲好虛弱....聞者心酸....
今朝佢做左手術, 割左盲腸....放工後達達車我 (o係呢度真係要多謝達達) 去 Prince of Wales 醫院探佢, 老闆仲託我買左o的花去...上到去病房見到佢訓左覺, 插住喉, 個人十分虛弱....佢連講野都冇力囉, 見佢開刀個傷口好大呀....唉.....
希望 Florence 個傻婆快o的好返啦....
Steak dinner
今日放左工同達達屋企人去食 steak, 好開心....又可以見到達達....媽媽今個星期日就要走lu....想佢留耐o的架, 但係臨時有變掛, 所以要提早返香港 一_一"....
食完晚餐後我地返左我屋企坐一陣, 舅父就好似細路仔咁係度數花樽裡面o既波子....婆婆就好想同路飛玩但路飛唔理佢....haha...好好笑....
整車呀....
之前架車個 back seat 個摺位有o的問題, 唔可以成個 seat 位捲起, 變左如果要載大件野就好煩麻...
今個星期六要幫人搬屋, 所以就"的"起心肝去整o番好架車...因為兩年車都算係新車啦, 仲有 warranty, 而家唔整過左個warranty就慘啦....
尋晚去達達o既婆婆屋企食飯, 本來諗住食完飯就走啦, 點知見到阿婆好唔開心 (因為佢老人家唔想返香港, 但係為左見下香港o的仔女同埋親戚, 下星期日會同達達媽媽一齊返去一個月), 所以我地就帶左佢地去 Parramatta 個 club 拉老虎機, 等佢開心o的....
之後達達就同我返屋企, 因為今日朝早七點半要拎架車去 Mazda 擺抵一整日, 然後再返工, 所以要開埋佢架車....
好開心呀, 又多左一日可以見到佢...但係難為左舅父今朝要自己搭火車返工啦....
放工後, 我地同埋舅父一齊食飯, 之後就 pick up o番架車....
睇屋....
今日起身後, 我同達達就去左搵佢媽媽﹑婆婆同大舅父去 Tony 舅父度...本來我地想去 Castle Hill 個 mall 行街, 但係我諗到, 既然要去 Castle Hill 咁遠, 而且又係街行, 不如去 Kellyville 睇示範屋啦....
自從爸爸媽媽上次o黎同uncle 佢地一齊去睇過之後, 就一直冇去過睇屋啦。o個度好大架, 有幾百間新屋都係示範屋o黎架, 而且間間都唔同, 只要你有一塊地, 然後睇中邊間屋, 就可以 exactly 咁起同一間屋o係自己塊地上面...都係好平咋嘛, 十幾萬至二十幾萬不等, 如果二十幾萬果o的就真係好豪華架啦....簡直係 dream house....如果我都有一塊地就好啦 =.=
Tony 舅父, 媽媽同婆婆都睇得好開心, 梗係啦, 呢o的野香港冇架嘛....既然達達媽媽下星期日就要返香港, 所以帶佢去睇下呢o的都好, 都不失為一個好節目......
至於係單層屋好, 定係複式好, 大家都有唔同意見...我自己就比較喜歡單層, 因為我由細到大都住複式屋, 住到怕怕....行樓梯行到怕怕....一個家庭點都係一層過好o的, 阿媽叫食飯都唔使叫得咁辛苦嘛 ^^"
話明係睇屋, 當然係得個睇字, 同個恨字啦....由於時間關係, 我地只係睇左幾百間之中o既六﹑七間, 如果要睇哂o的屋, 可能要兩日先得....
完左之後, 我地就去拉左一陣老虎機, 同去Tony 舅父屋企食飯囉 ^_^
好開心, 因為達達佢陪左我整個weekend....聽日又要返工lu....唔緊要, 我期待 Easter holiday \(^0^)/
去唱k
今日同達達, 拍直, mika 同佢男友 Moscow 五個人一齊去唱k, 唱左三個鐘, 好玩呀 :D
唱完k 就一齊去左食日本野, 我地之後傾計傾得好開心....拍直真係一個叻仔o黎架, 我覺得佢真係好勁架, 所以希望佢要加油啦, 咁有qualification o既人要好好把握機會....加油啦 !
今次, 慘啦....
公司自從搬左新office之後, o係我同波士兩個人拍住擋全面改革之後, 業務總算叫做蒸蒸日上....我都好開心....而且越來越多 overseas business, 老細見到就當然開心啦...
其實好多同事同我講, 以我碩士同埋咁多 degrees o既 qualification, 唔應該o係呢度再做落去, 佢地叫我不如去搵政府工仲好啦。前個星期, 我見波士唔o係度, 我個同事(佢以前打政府工打o左十幾年) 就同我講, 佢話, 見我咁聰明 (嘻, 其實係扮架咋), 又係一個好女仔 (佢意思係話我野心唔大), 不如試下搵政府工啦, 咁佢又見我 Aunty o係澳洲國防部做人事部 (佢原來都知我 aunty 係邊個), 不如叫我 aunty 同我睇下有冇government工適合我......又係喎, 俾佢咁講, 心思思....不妨一試都好.....
轉工還轉工, 既然我同公司有一個 commitment, 我都要扶住公司到佢真係搞得掂, 我先會走, 我做人點都係有責任心, 唔可以掉抵波士一個人唔理佢, 話哂, 點都係呢間公司o係我最缺錢, 做人最底潮o既時期俾個機會我請o左我, 做人都要感恩架嘛.....
點解話我要扶住間公司呢? 唉.....真係, 咪就係波士囉, 佢五月尾要去美國加拿大一個月, 佢唔係度, 就係我做主架啦.....之前同佢傾過, 我爸媽想我返香港行下, 所以想五六月返香港一個月, 本來佢想就我, 試下 book 四月走, 但係 book 唔到佢想要o既機票...但佢冇同我講, 直至昨天, 佢走過o黎我張 desk 度, 同我講個 bad news, 佢 book 左 5月27日走....咁我就晴天霹靂啦.....我﹑我﹑我﹑......點走呀????
冇計, 我話我等佢返來澳洲, 我先走囉....又要推遲日子返香港啦, 唔想都冇計....今次, 慘啦....香港到時一定會係盛暑, 一向怕熱o既沙灘貓, 可能要變做燒膿貓 一_一"
New office - 我的一角
陽光男孩
一歲, 蜜柑, 生日快樂
星期四, 逛街去
今日又係照常返工啦, 冇乜特別, 特別在於今日係星期四啦, 聽日又出糧啦...yeah~
本來今日冇約到達達, 但係佢話佢好掛住我喎...(嘻), 咁所以佢放左工o黎Bondi搵我一齊去行街囉。
好開心見到佢, 好難得架, 人地住得遠嘛, 三十幾公里喎....幾難得呀.....XDDDD
我地兩個行左 Bondi 個 shopping mall, 好大, 不過冇買野, 都係志在兩個傻傻咁行下je....(嘻)
之後我地去左食日本野, 傾左好耐計....我地兩個計劃六月會返香港一趟, 有可能會去日本或台灣玩, 不過最緊要係我成一年半冇返過去啦, 好掛住爸爸媽媽 :( 仲有就係返香港買野囉, 有好多野想買....希望波士可以俾我六月拎假啦.....
電話....
今日好忙, 唔係返工忙, 而係我自己好忙....又要忙返工, 又要去交汽車保險, 之後要去交牌費....etc....
不過都總算忙完一日啦, 又係返到屋企, 再夜o的就等達達打電話o黎...嘻嘻....好掛住佢....
尋日返工果陣, 好突然, "佢"打電話俾我, 係打我 mobile, "佢" 話俾我聽, "佢" 同而家o既女友就o黎要分手, 好唔開心, 好煩...我聽到都唔開心左一陣, 諗左一陣...其實點解"佢"女友要提出分手, 我係最清楚o個個, 以"佢"咁o既做男友性格, 試問又點可以留住身邊o既女仔呢? 我實在太清楚"佢"啦....唉....真係難為個女仔.....算啦唔好提.....不過 anyway, 我係好唔想睇到佢地散囉, 講真, 人又點會冇缺點呢? 大家o係埋一齊意見不合又好, 鬧交又好, 呢o的點都會少不免, 有冇諗過替對方想想, 然後退一步會海闊天空呢? 自以為是﹑自把自為﹑唔聽別人意見永遠係最大禁忌....唉....
另外, "佢"都知道我有男友啦, 仲係好鍚我添 ....^_^....
我o係呢度衷心祝福"佢"同女友可以和好如初, 永遠都咁愛大家啦....
蜜柑生日啦 !!!!
好開心好開心~!! 蜜柑今日生日啦, 大個仔一歲啦!今日有Mika, Kidy, 拍直同埋蜜柑爸爸達達o黎佢o既生日會呀!!估唔到呢個小朋友都有咁多人同佢慶祝, 你真係大陣象啦....另外最開心當然係Kidy都有o黎我屋企啦, 個衰婆次次都厭我呢頭遠唔o黎探貓地, 好呀, 今次請到佢o黎我真係好好好開心呀, 仲有佢部 Canon 300D 相機啦~ 同小朋友們影左好多靚相呀 (朋友們可以去 http://hk.photos.yahoo.com/imbeachcat 睇睇, 好正架...) :D~~今晚食o既野係爸爸 (達達) 煮o既肉醬意粉同有媽媽 (即係我) 焗o既蜜糖雞翼....蜜柑柑同路飛飛就當然有高級濕糧食啦...hehe....爸爸煮o既意粉好好味呀~~ (其實媽媽焗o既雞翼都好好味)之後我地同貓地玩左一陣 (最主要係同路飛個肚腩影相, 呢o的相都放左上本相簿上啦), 跟住就係唱生日歌同切生日蛋糕啦....可惜 Ceci 唔o係度, 如果唔係仲熱鬧呀.....今日真係好開心, 蜜柑, 媽媽o係呢度祝你生日快樂, 永遠都咁快樂! 媽媽愛你 !
蜜柑小朋友一歲啦 ~ Happy Birthday
一歲啦....終於一歲啦....做媽媽的都希望自己的愛兒健康活潑, 生活繼續無憂無慮, 快快樂樂....
昨天有很多人來為蜜柑慶祝生日呀, 有拍直, Mika, 加菲媽當然還有蜜柑的爸爸達達啦 :D
很開心, 當然是替蜜柑高興啦, Mika姐姐送了蜜柑一個橙白色的毛毛棒玩具呀, 很合襯呢...多謝Mika姐姐啦~~蜜柑和路飛都很高興呀....
昨晚的晚餐是吃了達達煮的肉醬意粉, 和我焗的蜜糖雞翼 ^_^ 雖然不是很多食物 (因為放工後沒有時間弄的關係), 但很有氣氛呢....
昨晚全場的高潮應該是加菲媽用她帶來的Canon 300D 來替小朋友們影了很多沙龍, 嘩....300D真的與別不同呀 \(^0^)/~~yeah
最後, 我們吃唱了生日歌和吃了生日蛋糕完結了這晚的派對...這個派對很成功, 多謝各位的出值 ^_^
蜜柑, 媽媽永遠愛你! 愛兒生日快樂~
三月六日
今日一早六點半起身, 七點鐘準時出門口去機場, 因為達達o既 aunty 同表弟要飛返 Brisbane 啦....
之後返左屋企休息一陣, 之後就去左 Ikea 買新床。之前張雙人木床因為搬過幾次屋關係搞到o的接口位鬆哂, 成日自己一個人訓訓下覺到會"臨"....所以成日都好想買過張新床, 無奈又冇人幫我一齊去買, 咁而家好啦, 達達同我一齊去買, 仲有佢幫我砌添 ^_^
今日真係好麻煩佢啦, 因為我o既愚蠢, 搞到佢要做多好多功夫, 我又鑽錯螺絲...etc...一_一"
佢o係砌床呢個過程裡面都不知話左我幾多次蠢才啦, 咁我對於木工呢方面o既野又真係幾蠢o既.....嘻嘻......
多謝達達啦, 辛苦你啦....乖啦.....嘻嘻....同你一齊真係好開心^_^
聽日係蜜柑生日, 我地又可以見面啦....
我和海哲的故事
記得小時候很喜歡吃海哲。吃的感覺就像吃橡皮筋似的, 十分爽口, 而且味道又好每次跟表妹們到酒樓遇著有海哲這道冷盤我們一定會掙著吃過你死我活。筷子夾不到嗎? 用手抓來吃也在所不惜, 務求要掙到吃海哲。由此可見我愛吃海哲的程度。
大概到9,10 歲的時候, 發生了一件事, 從此以後, 我一生都不會再吃海哲這東西了...
十幾年前的一個暑假, 我們一家三口和表妹們幾家人一起到大嶼山唐福渡假。那時候的唐福還不是有太多遊人, 牛比人還要多。我們幾家人, 每年都一定會到唐福渡假, 這是我們的"傳統"。
那時候的我還不懂游泳, 面對著漂亮的海灘, 惟一的樂趣便是在沙灘上搞這個, 玩那個, 又或者行到遠一點近石灘的一帶玩。有一天, 我和兩個表妹行到沙灘和石仔灘的邊緣玩耍, 就在退潮正值的那一刻, 我們發現一隻大水母浮游在石罅之間, 牠一定是被潮水沖上岸後退不回大海。那麼大的水母我還是第一次親眼見到 (除了在水族館看見的那些), 單是牠的直徑己有大概 80 厘米吧, 真的很大。這個小時候有搗蛋王之稱的我, 看見這麼大的水母浮在眼, 當然不會輕易讓牠生存下去吧。
於是, 我們便想盡辦法阻止牠沖回大海。三個人與大水母即時長開一場恐怖的大屠殺。當上司令大將的我, 當然要指揮兩個手下對大水母發動攻勢吧! 首先, 我用在近拾到的燒烤叉瘋狂地插向牠那透明的圓頂, 然後再指揮兩個表妹用石頭投擲牠。大水母不甘示弱, 拼命地伸出毒鬚向我們還擊。我心想, 你這種沒腦的元始生物9成沒有神經的吧? 你竟然向人類文明挑戰? 好! 我便承全你, 讓你死無全屍吧!
由於潮水時漲時退, 令到戰況更加激烈, 大水母繼續伸出牠的毒鬚向我們還擊。我們三人又插又擲殘忍不過, 又起圍牆阻止牠溜出大海, 經過大半小時的搏鬥, 大水母終於支持不住, 沒有再掙扎了。於是, 我用燒烤叉小心翼翼地把牠撈起。相信已經死了的大水母被我們插得爛溶溶一塊, 死狀極之恐怖, 而且死後的牠全身也漲起來, 我相信起碼有1.5米長闊。可憐的水母不斷有潺水流出體外, 所以我的燒烤叉也很難把這塊漿糊扒開, 以致到這個水母身首異處。沒多久, 我們已經再沒有興趣繼續跟這塊東西糾纏下去, 於是決定回去渡假屋。那一晚, 殘殺水母的每一段過程印在我腦海裡, 好像還造了個惡夢。翌日早上, 我獨自回到案發現場看看水母屍體變成怎樣, 怎料, 我看到的是一堆晒乾了的漿糊腥臭地攤在岸上, 還有無數的蒼蠅正在分享這屍體....還有....噢, 我不敢形容易下去了....
會不會是這水母臨死前的咒詛, 這十幾年來我從不敢吃過一口海哲。每次見到這種食物, 我的腦海必定浮現出那水母死時的程景, 和那濃烈的腥臭味, 而且還有作嘔的感覺。我想, 我這一生都會繼續被這隻水母咒詛下去....
有毛o既大蜘蛛呀 >.<
好開心, 因為又係星期五 ^_^
放左工出 City 搵達達同佢屋企人, 再加上Brisbane 既 Aunty 落左o黎Sydney, 咁我地就出左去食飯....食完飯之後, 我車佢 Aunty 同表弟 & 舅父去 Parramatta, 達達就車媽媽同婆婆, 我地幾個一齊去Club, 因為達達想練歌....佢好似自從一月尾歌唱比賽之後大病一場, 一直都冇去過練歌啦....其實佢病仲未好返 (嘩...諗起上黎都病左個幾月啦).....同佢練完歌返到屋企, Ceci話頭先有好大隻蜘蛛走入屋, 有兩隻手掌咁大, 咁有毛添呀~好得人驚。
至於小朋友們, 路飛見到隻蜘蛛就勁驚 (一_一" 有冇搞錯!!?) 即刻躲埋一角...而蜜柑小朋友, 因為蜘蛛出見一刻佢正在如廁, 所以唔知發生過乜事, 出返大廳時隻蜘蛛已經俾 Ceci 男友朋趕走左喇....蜜柑真係好彩..... 咁毛毛就o係房入面都係唔知發生左乜事....
而我地返到屋企o既時候, 隻蜘蛛雖然已經走左, 我亦見唔到隻蜘蛛, 但係就見到路飛仲未驚完.....可憐小朋友個樣真係好驚, 好在媽媽返到, 即刻抱抱呵o番路飛先 ^_^.....而蜜柑小朋友, 都係唔知頭先發生乜事, 見到媽媽返黎就好開心, 通屋跑囉.....真係天真無邪。
同Mika去街街...
今日約左同Mika街夜街, 諗住五點半放工就即刻閃人去Randwick Mika屋企接佢一齊出City.
今日天氣唔好, 有雨, 而且係大雨....返工返到四點幾咁上下, 收到Ceci一個call, 因為佢尋日俾人偷銀包唔見左條屋匙, 我要放工後開車去佢返 Part time o既地方俾條 key 俾佢, 咁好啦, 因為佢鋪頭都係 Randwick , 咁都係順路。 點知, 同Ceci傾完計唔夠十分鐘, 卓頌恩打電話俾我, 佢叫我幫佢一個好大o既忙....佢要我放工後開車出 city Oxford Street 接佢, 因為佢買左d好大件o既美術用品要聽日交功課, 咁好啦, 佢又冇車, 又冇人冇物, 咁我放工後就出City接佢囉....接完佢, 要車佢返 Eastlake 屋企拎返d野, 之後要車佢去Uni接埋Helen, 然後再一齊去 Helen屋企....咁我去到 Mika 屋企接佢, 都已經係 7 點啦...唉.....
算啦, 我地去到City, 好容易就搵到位泊車, 可能係落雨d人唔想出街掛....我地買左我想買o既野, 同佢又去左紀伊國屋書店買左幾本書, 好開心, 呵呵呵...兩個人拖手隻行街街呀...XDDDDDD
嗯....總算有收穫......
三月二日
今日都係照常返工啦, 不過朝頭早要車舅父返工, 所以六點半就起身啦....好在, 自己返工冇遲到, 仲早到左.....返工, 都係咁啦, 本來諗住放工返屋企休息架, 因為真係好累, 點知達達o係三點幾時打電話來, 佢話佢買左點o係屋企煮飯, 仲叫埋媽媽同婆婆....因為佢話佢俾張 hacken + joey live 俾我呀....咁六點鐘我去左接舅父放工返佢屋企囉....途中都同舅父傾左好多計呀.....佢真係好犀利架, 一個人養左達達十幾年喎, 不過佢都老啦, 就快要退休, 所以達達一定要多o的孝順舅父呀.....
今日真係好開心 (又係開心既一日), 因為完全冇諗過會見到達達架, 真係出乎意料之外.....仲有可以食到佢煮既野食, 好好味呀 ^_^
三月一日啦
今日好開心, 因為放工之後又可以見到達達啦....本來呢, 我地兩個住得咁遠平日要返工應該好難見到面, 不過真係好想見到佢, 所以約定今晚放工後我去佢果度囉....咁五點半放工先返屋企沖個涼就飛車去見佢啦....佢同媽媽, 婆婆同舅父都等緊我食飯呀....我地今晚有鮑魚啦, 有王帝蟹, 遍皮鴨食, 食到好飽呀 :) 多謝達達.....今晚好開心 ^_^
