大鄉里終於出城啦~ (香港第三天)
經過左尋日成日留響屋企之後, 我呢個大鄉里終於出城啦...今日中午撘火車出九龍, 發現原來九廣東鐵多左個尖東站, 而且仲有馬鞍出線...嘩, 而家由上水可以直接撘到尖東, 唔洗由九龍塘轉MTR去尖咀, 又真係幾方便喎...
今日同爸爸媽媽一齊去左"朗豪坊"。我係第一次去, 覺得唔錯, 條電梯真係好鬼死長, 腳仔軟~~我地一直撘電梯上到最高層然後再逐層行落黎, 都差唔多行哂大部份0既shops。
因為今次係同爸媽一齊, 所以原本想買衫0既我一件衫都冇買到, 但係我會記住, 下次同friend去先大購物^^
都行左好耐啦, 又累, 於是我地決定快0的返屋企, 返屋企之前陪爸爸去書店買書, 佢又買左六百幾蚊書-.-。我地由青衣站直接撘專車返錦繡屋企, 又發現原來地鐵又多左個廸士尼站, 係粉紅色線架...
由青衣返到屋企只需20分鐘。返到屋企時, 發現有隻流浪貓走左入黎我地車房, 我即刻好驚咁要嚇走佢, 因為我屋企車房有個新0既燕子巢, 我怕隻貓會爬上去捉燕子...(對唔住呀貓貓, 我呢度暫時唔歡迎你住, 等燕子一家離開我屋企之後你就可以入黎啦, 因為小燕子要學飛嘛, 貓請勿進!!)
好在, 燕子爸爸同燕子媽媽都安全, 佢地好傻咁坐左0係個巢0既附近, 而巢裡面0既兩隻bb都冇事, 重訓緊覺, 不過可能我太大聲, 嘈醒左佢地...見到佢地個光頭樣真係搞笑...燕子bb好得意呀, 燕子爸媽萬歲!!!!
posted by 沙灘貓~Olive~ at
9:59 下午
0 comment(s):
Post a comment
<< Home