沙灘貓的私家海灘

兩個仔

路飛，我有時叫佢肥仔飛，因為佢好肥。呢個仔，細細個0既時候好活潑，成日要搶玩具玩。大個左之後，因為越來越重，活潑指數由80降至5。不過佢有個特點，就係好嗲人。加菲媽曾經不經意地講過:「你呢個仔0的性格真係一流。」其實同路飛相處耐左，你就會知道，哈! 佢從來唔會好似一般貓咁:『吼~~~』叫。你搞佢咩? 佢最多咪發出0的好嗲0既聲音—『咩~~』(調高音八度)，然後再加個「飛機耳」。呢個，係路飛極其量0既抗議。

路飛自從做左肥仔之後，佢終日0既嗜好就係睡覺。所以如果你見到路飛跑的話，朋友，你不妨去買六合彩啦。最近幾個月，我好狠心咁幫路飛減糧。目標係由17磅減至...let say，12磅咁啦。又迫佢做多0的運動，如果唔係，佢遲0的就會有好多病。前晚，我見到路飛0係屋企狂奔。對唔住，係狂奔! 9秒9果隻呢...由A點跑去B點，B點跑去C點，再由C點跑去B點......




跟住，今日，我見到佢同蜜柑打交。係追住黎啦，打到蜜柑一仆一碌。我開始發覺到一樣野: 路飛佢減肥進度都幾成功。最近明顯瘦左好多。唔通因為咁，佢0既活躍指數又再次提升?

蜜柑，我都會叫佢做蜜柑柑。佢個樣其實又真係幾靚仔，一面baby face，眼仔碌碌，鼻哥紅紅...而且仲好上鏡。不過，貓不可貌相。因為呢個仔係搗蛋星一名，而且鍾意駁嘴。活躍指數係110，爆燈。蜜柑0係屋企做盡無數壞事，多不勝數。今日佢又0係我煮飯時跳上個sink盤度想偷走我0的菜，當其時，我0係度切緊紅辣椒。我見佢咁曳，於是我整蠱佢，對條辣椒俾佢聞。佢千份之一秒0既反應就係飛機耳，擺出一副好討厭0既樣，跟住佢就開始鬧我:「喵喵喵喵喵...喵~」，意思係:「@$%&$#^&^$%@$#%$!!」你明架啦? 唉=3 呢0的咁0既仔，真係對住都頭痛。無奈...我鍚佢呀，所以咪縱壞左囉。

posted by 沙灘貓~Olive~ at 11:36 下午