沙灘貓的私家海灘

2006/08/03

黃A

中學時代曾有一位阿sir，教英文同宗教，叫 A. Wong (A=Anthony)，我叫佢做黃A (貪個名夠"娘")。

區內 BAND 1 的英文中學，校風一向出名純品。惟獨有我呢個人存在，喜歡搞三搞四，十足十一個男仔頭。

講返黃A，四十幾五十歲中年男人一個，o係本校任教多年，講野口疾疾，門牙甩左一隻，個頭三七分界。個人品就冇乜野o既，好「淋」o個種人啦，冇乜學生緣，獨行狹一個。平時入到課室鍾意搞個mic搞一大輪，又testing又喂喂喂...喂完又testing...啪啪啪...啪都啪左大半堂去。搞完個mic之後點名，and then 叫我地打開chapter唔知幾多，搵人讀下書，佢又讀下書，又叫人答下問題，最後都係冇人答，完堂。

所以每逢一到黃A堂，我地都會搵o的自己野做下，又或者傾下計，計得興起，越講越大聲，間課室就好似街市咁...佢Shhhuuu極o的人都唔收聲，於是又好無奈咁自己讀番書。而中五那一年，記得時間表中每一週都會有一日係連續三堂都係黃A堂，即係:兩堂英文+一堂宗教。每逢呢一日，大家都好無隱。

中五的中秋節，果日係連續黃A三堂，我做左一件好對唔住黃A 0既事。果年我做搞手，叫埋成班同學一齊帶埋O的過節食品例如有月餅(冰皮&啡皮)﹑水晶梨﹑碌柚﹑中有其他唔知咩野食...好多好多，跟住仲有人帶埋燈籠。我地成班人一於好少理，0係課室又食又玩，玩得好過份。本來有O的同學好反對我地的，都加入埋一份，實行全班同阿SIR搞對抗。果日臨落堂前，黃A終於發脾氣。

本來一班學習氣氛良好的班俾我搞到咁，雖然唔係咩壞行為，單純係百厭﹑頑皮，不過對於中五會考班來講，對於我校幾十年來傳統優良校風講，我地呢班5A，真係史無前例。

o係校務處，面對住我班主任袁SIR，令人又多一分無奈，點解有女仔可以曳成咁架?

中六我順利升讀原校(會考成績出奇地好)，黃A已經冇再教我地。

我無讀中七，阿媽頂唔順我送左我去流學。一去就去左好多年，經歷過好多事，去過好多地方，住過o係瑞士兩年﹑美國工作兩年﹑最後去到澳洲仲移o左民，轉過好多工作，最後結婚....呢O的經歷完全將我整個人改變。

事隔咁多年，唔知黃A變成點呢? 其實我都好後悔當年對佢所做o既事，只怪當時年少無知，鍾意玩，鍾意搞亂檔。如果有幾會俾我見番黃A唔知我會想同佢講o的乜呢? 我希望可以同佢講聲對唔住。

雖則當年係有少少過份，不過大家同學都似乎回味無窮，事隔咁多年拎返出黎講都仲覺得好好笑。